Deputetja e Partisë Demokratike të Kosovës, Ariana Musliu Shoshi përmes një postimi në llogarinë e saj në Facebook ka thënë se Ministria e Shëndetësisë dhe Instituti Kombëtar i Shëndetësisë Publike nuk janë në dijeni për numrin e saktë të të infektuarve me Covid-19 në Mitrovicën e Veriut.

Njoftimet e djeshme tregojnë funksionimin paralel dhe ndërhyrjen e Serbisë në sistemin shëndetësor në Kosovë. Komunat në atë rajon të Kosovës nuk janë duke i raportuar të dhënat për rastet e të prekurve me Covid-19 te Ministria ose Institutim përderisa dihet se ligjërisht të vetmet organe shtetërore që duhet të kenë kompetencë për të vepruar në atë pjesë janë Ministria dhe Instituti.

Postimi i saj i plotë:

Ministria e Shëndetësisë dhe Instituti Kombëtar i Shëndetësisë Publike të Kosovës janë institucionet e vetme për të komunikuar dhe të lëshuar njoftime të sakta dhe valide në lidhje me të infektuarit me Covid-19 në tërë territorin e Republikës së Kosovës. Ndërsa, kjo nuk aplikohet kur është në pyetje veriu i Mitrovicës!

Jo më larg se dje, dy kryetarët e komunave të Mitrovicës (Agim Bahtiri dhe Goran Rakiq) mbajtën konferencë duke treguar situatën aktuale në lidhje me pandeminë. Z. Rakiq, tregoi se numri i të infektuarve me Covid-19 në pjesën veriore është 17 dhe janë mbi 200 qytetarë të izoluar. Përderisa nuk ka asnjë njoftim zyrtar nga Ministria për këtë numër të të infektuarve, si institucioni i vetëm që e ushtron mbikëqyrjen ligjore dhe profesionale në tërë sistemin shëndetësor të Kosovës.